बेंसीशहर(लमजुङ)। मनाङमा जिप दुर्घटना हुँदा दुई जनाको मृत्यु भएको छ ।
माथिल्लो मनाङबाट सदरमुकाम चामेतर्फ आउँदै गरेको ग १ ज ६६०२ नंको जिप नेस्याङ गाउँपालिका–१ पिसाङ नजिकै दुर्घटना भएको हो । दुर्घटनामा १० जना घाइते भएका छन् । मृत्यु हुनेको सनाखत हुन नसकेको प्रहरी नायब उपरीक्षक चित्रबहादुर गुरुङले जानकारी दिनुभयो ।
घाइते सबैलाई उपचारका निम्ति सदरमुकाम चामेस्थित जिल्ला अस्पतालमा ल्याइएको प्रनाउ गुरुङले जानकारी दिनुभयो । घटनास्थल सदरमुकाम चामेबाट करिब १५ किमी उत्तरतर्फ पर्छ । रासस
