विगत दुई दशकदेखि जापानमा रहँदै ब्यबसाय सक्रिय रहनुभएका कास्की लेखनाथका खड़कसिह गुरुङ्ले आफ्ना बुबा जुमबहादुर गुरुङको स्मृतिमा दुई तले, दुई कोठे भवन निर्माणा गरी हस्तान्तरण गर्नुभएको छ ।
लेखनाथ महानगरपालिका वडा नम्बर २८, माझठाना रैकरस्थित श्री रत्न शोभा मावि परिसरमा सो भवन निर्माण सम्पन्न भएको हो । नवनिर्मित भवनको वैशाख २५ गते उद्घाटन तथाहस्तान्तरण गरिएको थियो ।
सो भवनको जुमबहादुर गुरुङकी धर्मपत्नी चिज कौरी गुरुङ्ले उद्घाटन तथा जस्मी गुरुङले हस्तान्तरण गर्नुभएको हो ।
भवन निर्माण समितिका अध्यक्ष लिलबहादुर थापाका अनुसार भवन बनाउन २७ लाख ५० हजार खर्च भएको छ । १९ लाख ८२ हजार खड्कसिंह गुरुङले ब्यहोरेका हुनभने नपुग सात लाख ६७ हजार अन्य दाताबाट संकलन गरिएको हो ।
गत साउन ५ गते बुबाकै स्मृति दिवसका दिन शिलान्यास भएको उक्त भवन १० महिनामै निर्माणकार्य सम्पन्न भएको थियो ।
कास्कीका जिल्ला शिक्षा अधिकारी नन्दलाल पौडेलको आतिथ्यतामा विद्यालय व्यवस्थापन समिति कार्यवाहक अध्यक्ष नारायणी पौडेल, प्रधानाध्यापक गोपालबहादुर बुढाथोकीले संयुक्त रुपमा भवनको तालाचाबी हस्तान्तरण गर्नुभएको हो ।
सो भवन निर्माणका लागि १९ लाख ८२ हज़ार ४ सय ४९ र ७ लाख ६७ हज़ार ६ सय ६२ रुपैयॉ संकलन भएको र २७ लाख ५० हज़ार १ सय ११ रुपैयाँ ख़र्च भएकाले दुई लाख बीस हजार रुपैयाँ छात्रवृत्तिका लागि अक्षयकोष स्थापना गरिएको छ ।
