काठमाडौं २५ काठमाडौं–जुन जातिको कार्यक्रममा गयो, त्यही जातिको पोसाक लगाउने र सकेसम्म उनीहरूकै भाषामा सम्बोधन गर्न खोज्ने पूर्व प्रधानमन्त्री डा. वाबुराम भट्टराईको शैली हो । मंगलवार प्रधानमन्त्री पुष्पकमल दाहाल प्रचण्डले झन्डै त्यही शैली पच्छ्याए, आदिवासी जनजाति दिवसको सन्दर्भमा आयोजित एक कायक्रममा ।
उसो त प्रचण्डले कुनै समय सोलुखुम्बु जिल्लामा बख्खु लगाएरै ‘स्वायत्त शेर्पा गणराज्य’को घोषणा गरेका थिए । मंगलवार पनि किराँत–लिम्बु जातिहरूले बजाउने ढोल भिरेर प्रधानमन्त्री प्रचण्डले जनजातिको मन जित्ने कोसिस गरे । २२ औँ विश्व आदिवासी जनजाति दिवसको सन्दर्भमा नेपाल आदिवासी जनजाति महासंघले आयोजना गरेको कार्यक्रममा प्रधानमन्त्री प्रचण्ड र कांग्रेस वरिष्ठ नेता रामचन्द्र पौडेलले ढोल भिरेर बजाएको अभिनय गरे । जनजाति अगुवाहरुले भने परर ताली बजाए । कार्यक्रममा बोल्दै प्रचण्डले आगामी वर्षदेखि जनजाति दिवस सरकारले नै मनाउने घोषणा गरे !
साभार : लोकान्तर
