काठमाडौंं – साहित्यकार तथा चलचित्रका निर्माता निर्देशक गगन विरहीको निधन भएको छ । आइतवार दिउँसो ४ बजे नर्भिक अस्पतालमा उनले अन्तिम सास लिए ।
लामो समयदेखि कलेजो रोगबाट पिडित उनलाई अचानक रुघाखोकी र ज्वरोले गालेपछि गत शनिबार नर्भिक अस्पतालमा उपचारको लागि भर्ना गरिएको थियो । उनको निधनको कारण निमोनिया र मृगौलामा देखिएको असरका कारण रहेको अस्पतालले जनाएको छ ।
‘झ–झल्को’, ‘मितेरी गाउँ’, ‘शिखर’ र ‘घर–आँगन’ जस्ता नेपाली चलचित्र निर्देशन गरेका विरहीको आइतवार साँझ नै पशुपति आर्यघाटमा अन्त्येष्टी गरिएको छ ।
‘संकल्प’बाट गीतकार र प्रस्तुतकर्ताको रुपमा चलचित्र डेब्यु गरेका उनले ‘भाउजु’ र ‘ट्रक ड्राइभर’का गीत समेत लेखेका थिए । बिरहीले ‘मितेरी गाउँ’, ‘शिखर’ र ‘घर–आँगन’आफैले निर्माण गरेको चलचित्र हो ।
केही दिन अगाडि उनी आफ्नो पछिल्लो कृती बिमोचन तयारीमा थिए । तर स्वस्थ्यमा समस्य देखिए पछि उनलाई अस्पताल भर्ना गरियो । पिताको सपना छोरी एलिना श्रेष्ठ अस्पतालमा पुराएकी छन् । निधन हुनु दुई घन्टा अघि छोरी श्रेष्ठले विरहीको अन्तिम कृति ‘हस्ताक्षर’ अस्पताल परिसरमा लगेर बिमोचन गराएर पिताको समपना पुरा गरेकी हुन् ।
नेपाल टेलिभिजनको पहिलो समाचारवाचकको रुपमा समेत परिचित ६१ वर्षीय विरहीका करिब ६ दर्जन कृति प्रकाशित छन् । उनका श्रीमती, एक छोरा र छोरी रहेका छन् ।
