बेलायतमा भएको आगलागीमा मर्नेको संख्या ३० पुग्यो

• लण्डन । बेलायतको लण्डनमा रहेको एउटा आवास भवनमा भएको आगलागीमा परी मृत्यु हुनेहरुको सङ्ख्या ३० पुगेको छ ।

महानगरपालिकाका प्रहरी प्रमुख स्टुअर्ट कुन्डीलाई उद्धृत गर्दै स्काई न्युजले तीस जनाको मृत्यु भएको समाचार लेखेको छ । प्रहरी प्रमुख कुन्डीले केही गम्भीर घाइत रहेकाले सो त्रासदीपूर्ण घटनामा परी मृत्यु हुनेहरुको सङ्ख्या अझ बढ्न सक्ने बताउनु भएको छ । घटनामा घाइते भएका मध्ये १२ जनाको अवस्था अत्यन्त चिन्ताजनक रहेको उहाँले जानकारी दिनुभयो । प्रहरीले घटनाका बारेमा अनुसन्धान भइरहेको बताएपनि अहिले सम्म आगलागीको कारण र कस्ले लगाएको थियो भन्ने बारेमा केही पत्ता लाग्न सकेको छैन । शहरी खोजी तथा उद्धार संकाय र ३० जना विज्ञहरुको समूह आगलागीमा परेकाहरुको खोजी तथा उद्धारका लागि लगातार परिचालित भएका छन् । उनीहरुले आगलागीबाट भएको खण्डहर हटाउने कार्य पनि गरिरहेको अधिकारीहरुले बताएका छन् । हतियार सहित एक व्यक्ति संसद भवन अगाडीबाट पक्राउ लण्डनको संसद भवन अगाडीबाट धारिलो हतियार सहित शुक्रबार एक व्यक्ति पक्राउ परेका छन् । तर पक्राउ गरेका व्यक्तिका बारेमा भने प्रहरीले थप केही जानकारी दिएको छैन । तीन महिना अगाडी इस्लामिक स्टेट (आइएस) लडाकूहरुले आक्रमण गरेको ठाँउ नजिकैबाट उनलाई पक्राउ गरिएको हो । स्थानीय समय अनुसार विहान ११.१० मा उनलाई मध्य लण्डनमा रहेको ‘प्यालेस अफ वेष्ट मिनिस्टर’ बाट पक्राउ गरिएको अधिकारीहरुले बताएका छन् । “झण्डै तीस बर्षीय व्यक्तिलाई धारिलो हतियार सहित शंकास्पद अवस्थामा उनलाई पक्राउ गरिएको छ,” लण्डनको प्रहरी कार्यालयले जारी गरेको विज्ञप्तिमा भनिएको छ । संसदका प्रवक्ताले संसद बाहिर कुनै अप्रिय घटना हुने डरले आफूहरु त्रसित भएको बताउनुभयो । रासस÷एएफपी