काठमाडौं, जेठ २ – कामी रिता शेर्पाले २२ औं पटक सर्वोच्च शिखर सगरमाथाको सफल आरोहण गरी विश्व कीर्तिमान कायम गर्नुभएको छ ।
यो वर्षको आरोहण सुरु भएको चाैथो दिन शेर्पा बुधबार चुचुरोमा पुग्नुभएको हो । ७ वर्षअघि सन् २०११ आप्पा शेर्पाले २१ औं पटक शिखर आरोहण गर्नुभएको थियो । यस्तै फूर्वा रिता शेर्पाले २०१३ मा २१ औं पटक सगरमाथा आरोहण गर्नुभएको थियो ।
बुधबार २२ औं पटक शिखरमा पुगेर कीर्तिमान कायम गरेका कामी रिताले पोहोर सगरमाथाको आरोहण गरेर आप्पा र फूर्वाको बराबरी गर्नुभएको थियो ।
यस वर्षको वसन्त ऋतुमा कामी रितासहित ६० भन्दा बढी आरोहीले ८ हजार ८४८ मिटर अग्लो सगरमाथा हिमालको सफल आरोहण गरिसकेका वेस क्याम्पस्थित सम्पर्क अधिकृत ज्ञानेन्द्र श्रेष्ठले जानकारी दिनुभयो । मौसमी खराबीका कारण हिजो आरोहण हुनसकेको थिएन । अहिले अनुकूल मौसमका लागि धेरै आरोही प्रतिक्षामा छन् ।
