काठमाडौं/
राष्ट्रपति रामचन्द्र पौडेलले दीप प्रज्वलन गरी सोनाम ल्होसार पर्वको शुभारम्भ गर्नुभएको छ ।
आज राष्ट्रपति भवन शीतल निवासमा आयोजित विशेष समारोहमा उहाले दीप प्रज्वलन गरी सोनाम ल्होसारको शुभारम्भ गर्नुभएको हो । राष्ट्रपति पौडेलले बहुजातीय, बहुभाषिक, बहुसांस्कृतिक विविधतायुक्त नेपाली समाजमा सोनाम ल्होसार जस्ता पर्वहरूले सबै नेपालीबीच आपसी सद्भाव,सहिष्णुता र बन्धुत्वको भावना अभिवृद्धि गर्दै राष्ट्रिय एकतालाई सुदृढ गर्न योगदान दिने विश्वास व्यक्त गर्नुभएको छ । उहाले नेपाल बहुजातीय, बहुभाषिक, बहुसांस्कृतिक र बहुधार्मिक देश भएकाले यहाँ बसोबास गर्ने सबै जातजातिको आफ्नो भिन्न परम्परा, रीतिरिवाज र संस्कृतिहरू रहेको बताउनुभएको छ । उहाले भिन्न सांस्कृतिक विविधता बोकेको नेपालमा तामाङ जातिको ठूलो समुदाय रहेको र तामाङ जातिको सामाजिक, सांस्कृतिक एवम् धार्मिक जीवनमा ल्होसार परम्पराको विशिष्ट र अत्यन्तै महत्वपूर्ण स्थान रहेको समेत बताउनुभएको छ । राष्ट्रपति पौडेलले गणितीय ज्योतिष परम्परामा आधारित ल्होसार पर्व तामाङ संस्कृतिकै एक अभिन्न अङ्ग भएको बताउँदै यसले तामाङ जातिको उद्गम, सभ्यता, सांस्कृतिक अस्तित्व र पहिचानलाई समेत प्रतिबिम्बित गर्ने बताउनुभएको छ ।।
