काठमाडौं/
आजदेखि विधिपूर्वक माघ स्नान अर्थात श्रीस्वस्थानी व्रत एवम् कथा वाचन शुरु भएसंगै काठमाडौंको साँखुको शालीनदीमा व्रतालुहरुको भीड लागेको छ ।
पौष शुक्ल पूर्णिमादेखि माघ शुक्ल पूर्णिमासम्म एक महिनासम्म श्रीस्वस्थानी व्रत र माघ स्नान गर्नकालागि टाँडाटाडाँबाट भक्तजनहरु शालिनदी गएको बताइएको छ । पौष शुक्ल चतुर्दशीको दिन हात गोडाका नङ काटेर स्नान गरी शुद्ध वस्त्र लगाएर यसको शुरुवात् गरिने धार्मिक मान्यता चलि आएको छ ।पौष शुक्ल पूर्णिमादेखि माघ शुक्ल पूर्णिमासम्मको एक महिनाको समयमा नेपालका विभिन्न शक्तिपीठहरुको पूजा आराधना गरिन्छ । ती स्थानमा सतीदेवीको अंग पतन भएपछि देवीदेवताको बास रहेको विश्वासका आधारमा यो परम्परा शुरु भएको हो । यो विधि अनुसार एक महिनासम्म व्रत गरी अन्तिम दिन अर्थात् माघ शुक्ल पूर्णिमाका दिन भगवतीलाई १०८ वटा– जनै, सुपारी, पान, फूल, रोटी, अक्षता, विभिन्न थरीका फलफूल, धूप, बत्ती, नैवेद्य, श्रीखण्ड, रक्तचन्दन, सिन्दूर, वस्त्र, भेटी चढाइन्छ । यस अवसरमा आजदेखि एक महिनासम्म साँखुको शालीनदीमा माधवनारायणको मेला लागेको छ । माघ महिनामा शालीनदीमा स्नान गरि माधवनारायणको दर्शन गरेमा पाप पखालिएर पुण्य प्राप्त हुने धार्मिक विश्वास रहेको छ ।। यसैक्रममा बिहान माघ स्नान गरी मध्यान्हकालमा महादेवको पूजा आराधना गरिन्छ । बेलुकी स्कन्द पुराणको केदार खण्डअन्तर्गत माघ माहात्म्यको कुमार अगस्त्यबीच संवाद भएको श्रीस्वस्थानी व्रत कथा सुन्ने सुनाउने परम्परा चलि आएकोे छ ।
