आज मंसिर महिनाको धान्य पूर्णिमा योमरी पुन्ही र उधौली पर्वका रुपमा देश भर मनाइँदैछ । पर्वको उपलक्ष्यमा राष्ट्रपति रामचन्द्र पौडेलले शुभकामना व्यक्त गर्दै सांस्कृतिक पर्वले विविधता भएको नेपाली समाजमा आपसी सद्भाव, सहिष्णुता र भ्रातृत्वको भावना अभिवृद्धि भई राष्ट्रिय एकतालाई थप सुदृढ बनाउन सहयोग पुग्ने विश्वास व्यक्त गर्नुभएको छ । राष्ट्रपति पौडेलले उधौली पर्व २०८१ का अवसरमा शुभकामना सन्देश दिनुहुँदै सो विश्वास गर्नुभएको हो । यसैरी, नेपाली कांग्रेसका सभापति शेरबहादुर देउवाले किराँतहरूको उधौलीपर्व, ज्यापु समुदायको महत्त्वपूर्ण चाड योमरीपुन्हि र धान्य पूर्णिमाका अवसरमा शुभकामना व्यक्त गर्नुभएको छ ।।नेपाली समाजमा धानलाई लक्ष्मी वा समृद्धिको प्रतीक मानेर पूजा गर्ने परम्परा रहेको छ । यस दिन धानको पर्वत बनाएर पूजा गर्नाले धनधान्य वृद्धि हुने विश्वास गरिन्छ । नयाँ उब्जिएको खाद्यान्न आफूले खानुभन्दा पहिले देवता र पितृलाई चढाएर मात्र आफूले खाने परम्परा अनुसार विशेषगरी पहाडी क्षेत्र तथा अन्य स्थानमा बसोबास गर्ने समुदायले कुलपूजा र गोठपूजा गर्ने चलन छ । यसैगरि नेवार समुदायले आज योमरी पुन्ही मनाउँदै छन् । चामलको पीठो, चाकु, कालो तीलको योमरी बनाएर यस वर्ष भित्राएको अन्नबालीसहित भकारी पूजा गर्ने चलन छ । यसरी पूजा गरेमा वर्षभरी अन्नको अभाव नहुने जनविश्वास रहेको छ । योमरी पून्हीको अवसरमा आज देशका विभिन्न क्षेत्रमा विभिन्न कार्यक्रमको आयोजना गरि मनाइँदै छ । यस्तै, किराँत समुदायले आफ्नो महान पर्व उधौली मनाइरहेका छन् । हरेक वर्ष मंसिर पूर्णिमाका दिनदेखि शुरु हुने उधौली पर्व मानिस, जनावर र चराचुरुंगी लेकबाट बेसितिर बसाइँ सर्ने समय भएको संकेतका रुपमा लिइन्छ । साथै अन्नबाली भित्र्याइएको खुसीयालीमा यो पर्व मनाईन्छ । ज्यापु दिवस पनि आजै भएकाले देशभरका ज्यापु समुदायले विभिन्न कार्यक्रमको आयोजना गरी आज ज्यापु दिवस मनाउँदै छन् । आज नेपाली समाजका विभिन्न समुदायले मंसिरे पूर्णिमाका रुपमा पर्व मनाउँदैछन् । सरकारले आज देशभर सार्वजनिक बिदा समेत दिएको छ ।
