जापान। १० दिने बिशेष क्याम्पका लागि नेपाली राष्ट्रिय फुटबल टोली जापान आउने भएको छ ।
आगामी साउन २७ देखि भदौ ५ गतेसम्म टोकियोमा हुने क्याम्पमा नेपाली टोली जापान आउने अखिल नेपाल फुटबल संघ एन्फाका प्रमुख कार्यकारी अधिकृत इन्द्रमान तुलाधरले पुष्टि गरे ।
नेपाली टोलीका जापानी प्रशिक्षक ग्योतोकी कोजी र टेक्निकल डाइरेक्टर ताकेदा चियाकीको पहलमा जापानी दूतावासको आयोजनामा टोली जापान पठाउन लागिएको पनि सिइओ तुलाधरले जानकारी दिए ।
१० दिने जापान भ्रमणका लागि नेपाली टोली साउन २६ गते त्यसतर्फ लाग्नेछ भने जापानका युनिभर्सिटी र क्लवका टोलीहरुसँग नेपाली टोलीले बढीमा पाँच खेल खेल्नेछ । त्यस्तै प्रशिक्षण क्याम्पका साथै जापानी ब्यवसायिक प्रशिक्षहरुबाट प्रशिक्षणको व्यवस्था पनि हुने सिइओ तुलाधरले बताए ।
नेपाली राष्ट्रिय टोली एएफसी एसियन कप छनोटमा व्यस्त छ । यसअघि फिलिपिन्स र यमनसाग खेलेको नेपालले आगामी खेल ताजिकिस्तानसाग खेल्नेछ । दुई खेलमा १ अंक जोडेको नेपाल समूहको तेस्रो स्थानमा छ भने ६ अंकसहित फिलिपिन्स पहिलो र ४ अंकसहित यमन दोस्रो स्थानमा छ । ताजिकिस्तानले खाता खोल्न सकेको छैन । समूहको शीर्ष दुई टीम एएफसी एशियन कपमा छनोट हुनेछ ।
