चौथो टेस्ट क्रिकेटमा अस्ट्रेलियाले भारतलाई १ सय ८४ रनले हराएको छ ।
अस्ट्रेलियाले दिएको ३ सय ४० रनको लक्ष्य पछ्याएको भारत १ सय ५५ रन बनाउँदा अलआउट भएपछि अष्ट्रेलियाले सो खेल जीतेको हो । भारतका यशस्वी जयस वालले सबैभन्दा धेरै ८४ रन बनाए भने अस्ट्रेलियाका कप्तान प्याट कमिन्स र स्कट बोल्यान्डले ३÷३ विकेट लिएका थिए । अस्ट्रेलियाले दोस्रो पटकमा २ सय ३४ रन बनाउँदै भारतलाई ३ सय ४० रनको लक्ष्य दिएको थियो । यसअघि मेलबर्नमा टस जितेर ब्याटिङ गरेको अस्ट्रेलियाले पहिलो पटकमा ४ सय ७४ रन बनाएको थियो । यस्तै भारतले पहिलो पटकमा ३ सय ६९ रन बनाएको थियो । मेलबर्नमा भारतले टेस्ट क्रिकेटमा १३ वर्षपछि हार बेहोरेको हो । यसअघि सन् २०११ मा भारतले मेलबर्नमा हारेको थियो । यो जीतसँगै घरेलु टोली अस्ट्रेलियाले पाँच खेलको बोर्डर–गाभस्कर ट्रफी शृङ्खलामा २–१ ले अग्रता लिएको छ । शृङ्खलाको पाँचौं तथा अन्तिम खेल आउँदो शुक्रवारदेखि सिड्नीमा शुरू हुने कार्य तालिका रहेको छ ।।
