आगामी मंसिर २२ गतेदेखि हुने काभा मेन्स भलिबल क्लब च्याम्पियनसिपको ट्रफी सार्वजनिक गरिएको छ ।
नेपाल भलिबल संघले हिजो एक कार्यक्रम आयोजना गर्दै काभा पुरुष भलिबल क्लब च्याम्पियनसिपको ट्रफी सार्वजनिक गरेको हो । राष्ट्रिय खेलकुद परिषद् राखेपका सदस्यसचिव टंकलाल घिसिङले उक्त ट्रफी सार्वजनिक गरेका हुन । सो अवसरमा काभा जस्ता अन्तर्राष्ट्रिय प्रतियोगिता घरमै आयोजना गर्न राज्यले कम्तीमा एक प्रतिशत बजेट खेलकुद छुट्याउनु पर्ने उहाँको भनाई थियो । उहाँले नेपाली खेलकुदमा सबैभन्दा बढी प्रतियोगिता गर्ने संघ भएको पनि जिकिर गर्दै संघले उत्कृष्ट काम गरेको भन्दै खुलेर प्रशंसा गर्नुभएको थियो ।
आउदो शनिबारदेखि सुरु हुने च्याम्पियनसिपमा नेपालका दुई क्लबसहित कुल चार राष्ट्रको पाँच क्लबले यस च्याम्पियनसिपमा प्रतिस्पर्धा गर्नेछन् । नेपालको च्याम्पियन हेल्प नेपाल स्पोटर््स क्लब र गण्डकी प्रदेश भलिबल संघले प्रतिस्पर्धा गर्दैछन् । च्याम्पियनसिपको फाइनल आगामी मंसिर २९ गते हुनेछ ।।
