एन्फा महिला लिग फुटवलमा कोशी प्रदेशले लगातार दोस्रो जित हात पारेको छ ।
आज एन्फा कम्प्लेक्समा भएको खेलमा कोशीले बागमती युथ क्लब विरुद्ध २–१ को पुनरागमन जित निकालेको हो । खेलको २६ औं मिनेटमा विष्णुमायाले गोल गर्दै बागमती युथ क्लबलाई अग्रता दिलाएकी थिइन् । तर तीन मिनेटपछि कोशीका लागि समीक्षा मगरले बराबरी गोल फर्काएपछि खेल बराबरीमा भएको थियो । ५४ औं मिनेटमा बागमतीकी दिव्या यसमाली मगरले आत्मघाती गोल गरेपछि कोशीले २–१ को अग्रतासंगै दोस्रो जीत हासील गर्न सफल भएको हो । प्रतीक्षा राईको प्रहार मगरलाई ठोक्किएर आफ्नै पोष्टमा गोल भएको थियो । त्यसपछि खेलमा दुवैतर्फबाट गोल हुन सकेन । लगातार दुई जितपछि ६ अंक जोडेर कोशी शीर्ष स्थानमा छ । कोशीले पहिलो खेलमा वालिङ नगरपालिकालाई ४–० ले पराजित गरेको थियो ।।
