विभागीय नेपाल पुलिस क्लब आठौं आरबीबी एनभिए महिला तथा पुरुष भलिबल च्याम्पियनसिपको क्वाटरफाइनलमा प्रवेश गरेको छ ।
समूह चरणको अन्तिम खेलमा बुढानिलकण्ठ भलिबल क्लबलाई ३–० को सोझो सेटमा पराजित गर्दै समूह विजेताको रुपमा पुलिस क्वाटरफाइनलमा प्रवेश गरेको हो । त्रिपुरेश्वरस्थित राखेप कभर्डहलमा आज भएको खेलमा पुलिसले बुढानिलकण्ठमाथि २५–१९, २५–१४ र २५–२२ को सहज जित निकाल्यो ।
त्यस्तै आजै प्रतियोगीताको महिलातर्फ एभरेष्ट भलिबल क्लबले त्रिभुवन आर्मी क्लबलाई ३–१ ले पराजित गर्यो । एभरेष्टले आर्मीलाई २४–२६,२५–१७,२५–१७,२५–२२ ले पराजित गरेको हो । त्यस्तै आजै भएको महिलातर्फको अर्को खेलमा न्यु डायमण्डले उपाधि दावेदार एपिएफमाथि ३–१ को सेटमा पराजित गर्दै जित निकाल्न सफल भयो । डायमन्डले एपिएफ क्लबलाई २५–१७, १७–२५, २५–१५ र २५–२३ ले पराजित गरेको हो । नेपाल भलिबल संघको आयोजनामा जारी प्रतियोगितामा महिलातर्फ ७ र पुरुषतर्फ १३ टोलीको सहभागिता छ । दुवैतर्फको विजेता टोलीले ५ लाख, दोस्रो टोलीले २ लाख र तेस्रो टोलीले १ लाख २५ हजार रुपैयाँ प्राप्त गर्ने आयोजकले जनाएको छ ।।
