काठमाडौँ/
परराष्ट्रमन्त्री आरजु राणा देउवा चिनियाँ विदेशमन्त्री वाङ यीको मैत्रीपूर्ण निमन्त्रणामा आजदेखि चीनको औपचारिक भ्रमणमा प्रस्थान गर्नु भएको छ ।
प्रधानमन्त्री केपी शर्मा ओलीले यही मंसिर १७ गतेदेखि गर्न लाग्नुभएको चीन भ्रमणको पुर्व तयारीका लागि परराष्ट्रमन्त्री राणा आज चीन जानु भएको हो । चिनियाँ कम्युनिस्ट पार्टी केन्द्रीय समितिको राजनीतिक ब्युरोका सदस्य तथा विदेश मामिला केन्द्रीय आयोगको कार्यालयका निर्देशकसमेत रहनुभएका वाङको निमन्त्रणमा मन्त्री राणाले मसिर १३ देखि १५ गतेसम्म चीनको भ्रमण गर्ने कार्य तालिका रहेको छ । भ्रमणका क्रममा परराष्ट्रमन्त्री राणाले मसिर १४ गते आफ्ना चिनियाँ समकक्षीसँग द्विपक्षीय वार्ता गर्ने कार्यक्रम रहेको परराष्ट्र मन्त्रालयले जनाएको छ । भेटमा उहाँले प्रधानमन्त्रीको आसन्न चीनको औपचारिक भ्रमणको तयारीलगायत दुई देशबीचको आपसी हितका विविध विषयमा छलफल गर्ने बताइएको छ । उहाँ प्रधानमन्त्रीको भ्रमण दलमा पनि सहभागी हुनुहुने जनाइएको छ ।।
