काठमाडौं ।
हेम सरिता पाठक फाउन्डेसनले आयोजना गरेको भ्रष्टाचार विरुद्धको अन्तर्राष्ट्रिय कविता प्रतियोगितामा कवि तोया भट्ट पुरस्कृत भएका छन् ।
समाजसेवी हेम पाठक र सरिता पाठक (टेक्सस, अमेरिका)ले स्थापना गर्नु भएको सो पुरस्कारमा एक लाख राशिसहित सम्मानपत्र रहेको छ ।
सो निर्णय हेम सरिता पाठक फाउन्डेसन नेपाल शाखाका अध्यक्ष राधेश्याम लेकालीले प्रेषित गर्नु भएको पत्रमा उल्लेख गरिएको छ ।
यसअगि प्रतियोगिताका लागि प्राप्त कविताहरुमध्ये पहिलो चरणमा उत्कृष्ट पच्चीस कविताहरु सार्वजनिक गरिएको
थियो ।
सो प्रतियोगिताको लागि साहित्यकारहरु प्रमोद प्रधान, प्रा. डा. गोविन्दमान सिंह कार्की र पारश नेपाल रहेको तीन सदस्यीय निर्णायक समिति रहेको थियो ।
आगामी बैशाख १३ गते काठमाडौंमा कार्यक्रमको आयोजना गरी पुरस्कार प्रदान गरिने भएको छ । सोही दिन १ लाख राशिको भ्रष्टाचार विरुद्धको गीत प्रतियोगितामा पुरस्कृत "जनतालाई रुवायो" गीतका सर्जक गोपालप्रसाद थपलिया र सो गीतका गायक एवं सङ्गीतकार शिशिर योगी तथा २ लाख राशिको "टंकप्रसाद - रमादेवी पाठक अन्तर्राष्ट्रिय पत्रकारिता पुरस्कार"का पुरस्कृत पत्रकारहरु मातृका दाहाल र दीपा दाहाललाई पनि पुरस्कार अर्पण गरिने भएको छ ।
