काठमाडौं/
समाजवादी मोर्चाले सङ्घीय लोकतान्त्रिक गणतन्त्रको रक्षाको निम्ति चैत्र १५ गते काठमाडौंमा विरोध प्रर्दशन सहितको जनसभा आयोजना गरिएको जनाएको छ ।शनिबार ललितपुरमा पत्रकार सम्मेलन गर्दै समाजवादी मोर्चाले गणतन्त्रको रक्षाको निम्ति प्रतिगामी र पुर्नउत्थानवादी षड्यन्त्रका विरुद्ध चैत्र १५ गते काठमाडौंमा विरोध प्रर्दशन सहितको जनसभा आयोजना गरिएको जनाएको हो । मोर्चाले राज्य संचालकको स्वेच्छाचारिताका कारण देशले अप्ठ्यारो र संकटपूर्ण अवस्थाको सामना र भ्रष्टाचार, कमिशन र कालोबजारीले अर्थतन्त्र सङ्कटग्रस्त भएको समेत जनाएको छ । सरकार विचौलिया दलालहरुको स्वार्थसिद्धिमा केन्द्रीत रहेको भन्दै मोर्चाले लोकतान्त्रिक मूल्य मान्यताको उपहास गरेको आरोप लगाएको छ ।
सरकारको कुशासन र अस्तव्यस्तताका कारण नेपाली जनतामा एकपछि अर्को असन्तुष्टी र आक्रोश तीब्ररुपमा बढ्दै गएको मोर्चाको ठहर छ । पत्रकार सम्मेलनमा माओवादी अध्यक्ष पुष्पकमल दाहाल प्रचण्डले राजावादीको प्रदर्शनले झस्केको नभइ गणतन्त्रका पक्षधरहरुले जनतासमक्ष त्रुटी स्वीकार गर्दै अघि बढ्न खोजेको जानकारी दिनका लागि जनसभा आयोजना गरेको जानकारी दिनुभयो ।
प्रचण्डले समाजवादी मोर्चा सरकारमा जानका लागि नभइ मुलुकको परिवर्तनलाई जोगाउदै बलियो बनाउनका लागि गठन भएको स्पष्ट पार्नुभयो । उहाले पुरानै तथ्य र प्रमाणको आधारमा पूर्वराजा ज्ञानेन्द्र शाहबारे आफूले टिप्पणी गरेको भन्दै आमनेपाली जनताको मनमा भएको कुरा आफूले मुखरित गरेको धारणा राख्नुभयो ।त्यस्तै नेकपा एकीकृत समाजवादीका अध्यक्ष माधव कुमार नेपालले अहिले पूजिवादी व्यवस्थालाई परिवर्तन गनुपर्ने भन्दै सामन्तवादको व्यवस्थामा भने फर्कन नहुने जिकिर गर्नुभयो । व्यवस्था बदल्न चाहनेहरू अब प्रतिगमनतिर नभइ अग्रगमनतिर आउन उहाले आह्वान गर्नुभयो । समाजवादी मोर्चाले जनतामा पैदा भएको असन्तुष्टिलाई धमिलो पानी बनाई गणतन्त्रका विरुद्ध राजतन्त्र पुर्नस्थापनाको षड्यन्त्रमा प्रतिगामी र पुर्नउत्थानवादी तत्वहरु लागिपरेको भन्दै सशक्त प्रतिवाद गर्नु, गणतन्त्रको रक्षा गर्नु अहिलेको मुख्य कार्यभार रहेको मोर्चाद्वारा जारी प्रेस विज्ञप्तीमा उल्लेख गरिएको छ ।
