नेपाल उद्योग वाणिज्य महासंघका अध्यक्ष चन्द्रप्रसाद ढकालले पर्यटन क्षेत्रमा सरकारले लगाएको अतिरिक्त करको पुर्नबिचार हुनुपर्ने बताउनुभएको छ ।
सिंहदरबारमा आज बसेको प्रतिनिधिसभा अन्तर्गतको अन्तर्राष्ट्रिय सम्बन्ध र पर्यटन समितिको बैठकमा अध्यक्ष ढकालले बिभिन्न क्षेत्रमा लगाइएको अतिरिक्त करले पर्यटन क्षेत्रलाई असर गर्ने देखिएकाले अतिरिक्त करको पुर्नबिचार हुनुपर्ने बताउनुभएको हो । गत बजेटले हवाइ टिकट र होटलको लक्जरी कर थप गरेका कारण पर्यटन क्षेत्रलाई निरुत्साहित गरेकाले यसलाई सच्चाउनुपर्ने उहाले बताउनुभयो । त्यस्तै ढकालले भारतीयहरुले विवाह समारोह देश बाहिर गर्ने गरेकाले नेपालमा त्यस्तो समारोह गर्ने गरि आकर्षित गर्नसक्नुपर्ने बताउनुभयो । नेपाल र भारतको खुला सिमाना कारण पनि बैवाहिक समारोहका लागि नेपाल आउने भारतीय पर्यटकहरुको संख्या बढाउन सके यस क्षेत्रले फड्को मार्ने उहाको भनाइ छ । ढकालले पर्यटन बोर्डलाई प्रभावकारी बनाउदै निजि क्षेत्रलाई समेत समेटेर टाक्स फोर्स तयार गर्नुपर्ने सुझाव रहेको बताउनुभयो ।
समितिले पर्यटन तथा हवाई उड्ययन सम्बन्धी बिषयमा नेपाल उद्योग वाणिज्य महासंघसंग छलफल गरेको हो । यस बिषयमा पुन पर्यटनमन्त्रीसंग छलफल गरिने समिति सभापति राजकिशोर यादवले जानकारी दिनुभयो ।
