काठमाडौं
अफगानिस्तानसँग पराजित हुँदै इङ्ग्ल्याण्ड च्याम्पियन्स ट्रफी २०२५ बाट बाहिरिएको छ ।
अफगानिस्तानसँग ८ रनले पराजित भएसँगै इङ्ग्ल्याण्ड प्रतियोगिताको समूह चरणबाट बाहिरिएको हो । ३ सय २६ रनको लक्ष्य पछ्याएको इङ्ग्ल्याण्ड ४९ ओभर ५ बलमा ३ सय १७ रनमा समेटिएपछि अफगानिस्तानले इङ्ग्ल्याण्डलाई ओडिआईमा दोस्रो पटक हराउन सफल भएको हो । २ वर्ष अघि भारतमा भएको ओडिआई विश्व कपमा अफगानिस्तान विजयी भएको थियो ।
विहिबारको खेलमा इङ्ग्ल्याण्डका लागि जो रुटले सर्वाधिक १ सय २० रन बनाएका थिए । अफगानिस्तानका लागि अजमतुल्लाह उमरजाईंले ५ विकेट लिएका थिए । त्यसअघि पाकिस्तानको लाहोरमा रहेको गद्दाफी अन्तर्राष्ट्रिय क्रिकेट स्टेडियममा टस जितेर ब्याटिङ गरेको अफगानिस्तानले निर्धारित ५० ओभरमा ७ विकेट गुमाएर ३ सय २५ रन बनाएको थियो । अफगानिस्तानका लागि इब्राहिम जाद्रानले सर्वाधिक १ सय ७७ रन बनाएका थिए । इङ्ग्ल्याण्डका लागि जोफ्रा आर्चरले ३, लियम लिभिङ्स्टोनले २ विकेट लिएका थिए भने इङ्ग्ल्याण्ड लगातार दोस्रो हारका साथ प्रतियोगिताबाट बाहिरिएको छ । इङ्ग्ल्याण्ड पहिलो खेलमा अस्ट्रेलियासँग पराजित भएको थियो ।।
