काठमाडौं/
प्रधानमन्त्री केपी शर्मा ओलीले ‘बिमस्टेक’ शिखर सम्मेलनका मुख्य अन्तरवस्तु र संयुक्त राष्ट्र संघको दिगो विकास लक्ष्यसँग नेपालले लिएको ‘समृद्ध नेपाल, सुखी नेपाली’को आकाक्षा गहिरोसँग प्रतिध्वनित हुने बताउनु भएको छ ।
थाइल्याण्डको बैंककस्थित होटल साड्ग्रिलामा आयोजीत बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेक) शिखर सम्मेलनमा सम्बोधन गर्नेक्रममा उहाँले सो कुरा बताउनु भएको हो । उहाँले समृद्धि, लचिलो र खुलापनजस्ता बिमस्टेक सम्मेलनका तीन आधार स्तम्भ, दिगो विकास लक्ष्य र नेपालको राष्ट्रिय आकाक्षासँग गहिरो रूपमा प्रतिध्वनित हुने समेत बताउनु भएको छ । उहाँले बिमस्टेकले परिवर्तनशील समयलाई मात्र नभई हाम्रो क्षेत्रीय सहयोगलाई पुनःजीवित गर्ने अवसरलाई सदुपयोग गर्नुपर्नेमा समेत जोड दिनुभएको छ । प्रधानमन्त्री ओलीले हाम्रो सम्भावनालाई उजागर गर्न र हामीसँग भएका स्रोत साधनलाई पुँजीकृत गर्न एकीकृत प्रयास आवश्यक रहेको समेत बताउनुभएको छ । उहाँले जलवायु परिवर्तनले सम्पूर्ण मानवजातिको अस्तित्वमा संकट सृजना गरेको उल्लेख गर्दै यहाँका हिमालयहरू एसियाका लागि पानीका स्रोत भएको समेत बताउनुभएको छ । उहाँहरुले पहाडहरूको दुर्दशा र पहाड–महासागरबीचको सम्बन्धलाई उजागर गर्न, नेपालले आगामी मे महिनामा ‘सगरमाथा संवाद’ को पहिलो संस्करण आयोजना गर्न लागेको समेत उहाँले जानकारी दिनुभएको छ । यसैबीच, बिम्स्टेकको छैटौं शिखर सम्मेलन बैंकक सोचपत्र २०३० जारी गर्दै सम्पन्न भएको छ ।
