काठमाडौं/
प्रधानमन्त्री केपी शर्मा ओली थाइल्यान्डमा आयोजना गरिएको विमस्टेक शिखर सम्मेलनमा भाग लिन बैंककतर्फ प्रस्थान गर्नुभएको छ ।
थाइल्यान्डको औपचारिक भ्रमण र बहुक्षेत्रीय प्राविधिक तथा आर्थिक सहयोगका लागि बङ्गाल खाडीको प्रयास (बिम्स्टेक) को छैटौं शिखर सम्मेलनमा भाग लिन मंगलबार उहाँ त्यसतर्फ प्रस्थान गर्नुभएको हो त्रिभुवन अन्र्तराष्ट्रिय विमानस्थलमा प्रधानमन्त्री ओलीलाई उपप्रधान तथा सहरी विकासमन्त्री प्रकाशमान सिंह, गृहमन्त्री रमेश लेखकलगायतले बिदाइ गर्नुभएको थियो । प्रधानमन्त्री ओलीले कूटनीतिक सम्बन्ध स्थापना भएको ६५ वर्षपछि नेपालको पहिलो पटक थाइल्यान्डको औपचारिक भ्रमण गर्नुभएको हो । सो भ्रमणका क्रममा प्रधानमन्त्री ओली र थाइल्यान्डका नरेशबीच शिष्टचार भेटबार्ता गरिने कार्यक्रम समेत तय भएको परराष्ट्रमन्त्रालयले जनाएको छ । भ्रमणका अवसरमा पर्यटन र संस्कृतिका सन्दर्भमा दुुई समझदारीपत्रमा हस्ताक्षर गरिने कार्यक्रम समेत रहेको छ । दुई प्रधानमन्त्रीको उपस्थितिमा गैरसरकारी क्षेत्रबिच ६ वटा समझदारी पत्रमा हस्ताक्षर हुने कार्यक्रम तय भएको बताइएको छ । उहाँले थाइल्यान्डका प्रतिष्ठित व्यावसायीहरूसँग छलफल गर्ने र एसियन इन्स्टिच्युट अफ टेक्नोलोजीमा आयोजीत कार्यक्रमलाई विशेष सम्बोधन गर्नुहुने कार्यक्रम समेत तय भएको मन्त्रालयले जनाएको छ ।
